Imibare yatangajwe ku rwego mpuzamahanga yerekana ko muri Afurika abamaze kwandura COVID-19 barenze miriyoni 1.1, barimo abarenga ibihumbi 825.3 bakize n’abandi barenga ibihumbi 25.3 bahitanywe na cyo. Abamaze kwandura ku Isi bararenga miriyoni 21,7, barimo abakize barenga miriyoni 14.4 n’abapfuye barenga ibihumbi 770.7.
Mu gihe mu Rwanda imibare mishya yatangajwe kuri iki Cyumweru tariki ya 16 Kanama 2020, igaragaza ko habonetse abarwayi bashya 101 ba COVID-19 barimo 80 babonetse mu Mujyi wa Kigali.
Abo barwayi babonatse mu Mujyi wa Kigali bapimwe ahibasiwe kurusha ahandi harimo n’Isoko rya Nyabugogo (rizwi nko kwa Mutangana), bakaba bakurikiye abandi barenga 100 batahuwe muri iryo soko hamwe n’Isoko Rikuru rya Nyarugenge.
Ibyo byatumye ubuyobozi bw’Umujyi wa Kigali butangaza ko bufunze ayo masoko yombi guhera kuri uyu wa Mbere tariki 17 Kanama 2020 kugeza ku wa 24 Kanama hagamijwe kwirinda ikwirakwira rya COVID-19.
Abo 80 babonetse muri Kigali biyongeraho abashya icyenda batahuwe mu Karere ka Rusizi, abandi ikenda batahuwe mu Karere ka Rubavu, babiri bo muri Nyamasheke n’umwe wo mu Karere ka Huye.
Minisiteri y’Ubuzima yatangaje ko umubare w’abamaze gutahurwaho icyo cyorezo mu Rwanda ugera kuri 2,453 barimo 1,648 bamaze gukira kuva umurwayi wa mbere yagaragara mu Rwanda, barimo 17 bakize uyu munsi.
Kugeza ubu abakirimo kwitabwaho n’abaganga bageze kuri 797 mu barwayi bamaze kuboneka mu bipimo 334,270 byafashwe muri Werurwe kugeza ubu, aho iki cyorezo kimaze gutwara ubuzima bw’abarwayi umunani.
NIKUZE NKUSI Diane
